仲用緊儲水式電熱水爐嘅毛毛，呢幾日沖涼嗰陣真係覺得自己係玩緊Ice Bucket Challenge......係堅用冰水玩嗰隻，唔係好似阿強國首善陳光標咁扮浸冰水，其實冰下面係熱水嗰隻喎！

雖然佢後來解釋自己扮浸冰水呢個行為，係帶有誇張成分嘅行為藝術，不過對比起呢5個強國男，佢嗰啲所謂行為藝術真係可以即刻收皮，點解？呢5位強國男光脫脫咁喺風雪中狂奔咗兩公里呀！

雖然毛毛就唔係好睇到啲雪，但唔好話裸跑啦，你叫而家著到隻糉咁嘅毛毛落街跑，毛毛都唔睬你啦！

其中一個裸跑男仲話希望可以用呢種方式嚟致青春，仲話漫天飛雪可以洗滌心靈喎！嘩，佢呢句帶有陣陣MK味嘅說話，真係隔住個mon都feel到青春呀！

不過連假嘢都唔怕食嘅強國人，又點會怕凍喎，之前佢哋唔著衫兼坐住喺啲冰入面捉棋都得啦，裸跑之嘛，濕濕碎啦！

強國人果然真係唔係浪得虛名呀！毛毛唔是強國人，自然弱過人，已經預感到聽日會凍病㗎喇，55！

封面圖片來源：新浪中心
資料及圖片來源：壹週plus、新浪中心、蘋果日報、中文網
凍冰冰回帶：【冰鎮強國人】唔著衫坐落啲冰度都捉到棋