真係好凍呀……凍到毛毛啲手指都冰晒，差啲連字都打唔到呀。香港呢幾日得嗰幾度，大帽山仲得返-5度?呀，山上面結晒霜，成個冰封世界咁呀。

噚日係香港59年嚟最凍一日，唔少人都包到自己成隻傻咁上山去睇霜同強行溜冰～而廣州呢，都遇著60年嚟第一場雪喎！

呢張白雲山舖滿大雪嘅相喺強國瘋傳，嘩，成個山都白雪雪咁，真係搞到毛毛好想唱返句let it go～let it go～呀！

南方竟然落雪喎，真係聽都聽未過！所以有唔少廣州同胞都因為呢張相，想上山親眼睇下白色世界係點嘅～淨係排隊搭登山纜車都咁長龍，上到山會唔會人仲多過雪㗎？

天氣赤赤凍，啲風吹埋嚟好似刀割咁呀，真係好殘酷！不過現實仲更加殘酷，因為原來張白雲山大雪相，係改圖嚟㗎咋！睇下，雖然凍到喊，但山上仲係綠油油一片…… 算啦都一場上到嚟，都影返張相打個靚卡啦。

其實廣州警方已經喺馬路上面雞乸咁大隻字提咗大家張相係改圖嚟㗎喇，不過大家太想睇雪冇理到啫～唔緊要啦，畀張改圖呃上山啫，唱返句let it go，睇開啲啦。

封面圖片來源：廣州日報

資料來源：中新網