毛毛以前返學嗰陣最驚係咩？唔係凍到好似今日緊都冇得停課，最驚係個個同學仔都嫌毛毛kai，唔肯同毛毛玩呀！所以毛毛咪盡力埋堆囉，但結果都係forever alone......邊似得呢隻長頸鹿咁，雖然與眾不同，但都可以同其他長頸鹿做fd子～

是咁的，最近喺非洲坦桑尼亞嘅國家公園，有人發現咗一隻白色嘅長頸鹿喎！嘩......唔通長頸鹿已經進化到都識得用美圖獸獸？

其實呢隻長頸鹿仔係患咗「白毛症」呀，咁即係咩？咪啲毛會白啲咁解囉，醒目！

佢除咗顏色之外，同普通嘅長頸鹿係冇分別嘅～睇下，佢白白滑滑咁，真係自然過全智賢～

但係呢，由於呢隻長頸鹿好似螢火蟲咁出眾，專家（唔係的神）話佢好大機會成為獅子老虎嘅獵物，或者畀獵人捕捉，所以要特別保護佢......

唉，長頸鹿呀長頸鹿，你要好好喺大自然生存落去呀！終有一日毛毛會帶你去搵你嘅女神，成為童話故事嘅新一代男主角－白長頸鹿王子！哈，哈哈，冇咩嘅話，毛毛都係返出去做嘢先。

資料及圖片來源：Daily Mail