一講起馬拉松毛毛就扯火！因為次次想報，但最後都冇參加到⋯⋯

人類就話總是重複同樣的錯誤啫，之不過有隻汪星人就勁咯！學人參加馬拉松喎！

狗仔呀狗仔，做乜你混咗入堆馬拉松選手度嘅？主人話呀，本來放佢去附近散下步，屙個尿，但佢竟然跑咗去起點，聽到3，2，1，Get Set，Go！仲跟住一齊跑。全程21公里㗎喎！你頂唔頂得順㗎？

龜兔賽跑就聽得多啫！呢隻汪星人都同兔仔一樣咁寸嘴，跑跑下又會去溪邊飲返啖水，見到其他狗仔又玩一輪先，佢肯定心諗：「汪汪！汪汪汪！汪汪汪汪！汪汪！」即係點？下？乜你覺得毛毛識聽咩？不過睇佢個樣咁囂屎，應該心諗班人類喺度做乜9。

去到比賽嘅大直路，汪星人急起直追呀！跑呀跑呀跑跑跑！過完一個又一個人類，終於衝線，用咗1小時32分鐘52秒，拎到全個賽事嘅第7名呀幾威威！

佢衝線之後仲識停低，畀人影相同埋幫佢戴起個獎牌！散散下步都毛啦啦擺到牌，這些機會...... By the 威，呢個故事真係好勵志，令毛毛明白到，跑馬拉松呢回事可以係咁熱血！毛毛立定決心，下年⋯⋯都係照舊瞓下覺算⋯⋯

資料及圖片來源：enewscourier