仲記唔記得以前唔係人人都一機在手，出街想打電話要用電話亭嘅年代，成日都會有陌生人問可唔可以借一蚊畀佢打電話，後來又有好多地區名人，咩「5蚊哥」呀、「借錢搭巴士大媽」呀咁，搞到我哋一見到啲問我哋可唔可以幫幫佢嘅人就即刻好驚係咪騙徒。

咁如果唔係出咗名呃錢嘅地區名人，而係一個普通嘅老人家呢？大埔有個街坊話經過外賣壽司舖嘅時候，見到有個婆婆問一個路人可唔可以請佢食一件壽司，但個路人冇理佢。

之後呢位街坊話聽到婆婆自言自語話好想食一嚿呀，於是佢好唔忍心，就主動同婆婆講請佢食喇。雖然個post就冇講婆婆食到壽司之後開唔開心，不過毛毛諗，可以幫到人，其實自己仲幸福呀～

可能有啲人會驚呢個婆婆係職業騙徒，不過毛毛就覺得，只係幾蚊雞，如果負擔得起，就算真係畀佢呃，都唔係好大損失嘅話，不如就盡量滿足下一個老人家嘅願望啦，幫得幾多得幾多嘛。

係咪巧似巧有智慧呢，呢樣嘢，都係喺金句王度學返嚟㗎～計不到的，就用猜的，猜一猜最壞有多壞，如果最壞也不是太壞的話，GO呀嘛！GO GO GO！

封面圖片、資料來源：Tai Po 大埔