狗狗，做咩個頭腫到成個波咁呀？！唔通你好似之前隻臘腸狗咁，唔小心畀毒蛇咬親搞到「發過豬頭」呀？

台灣有人向流浪動物協會報案，話見到一隻個頭脹到好似氣球咁嘅狗仔，協會人員去到現場，仲以為係隻豬仔嚟呀。

點知原來呢隻狗仔，係因為條頸畀橡筋箍住，搞到氣管都穿埋，空氣灌咗入去，所以個頭脹成咁呀。睇見佢碌大對眼好似求緊人快啲救佢個樣……毛毛真係好心悒。

協會人員帶咗狗狗去動物醫院剪斷條橡筋，但醫生就話狗狗而家情況唔係好樂觀……狗狗，希望你可以大步躐過啦！

咁到底點解狗狗會啦啦畀條橡筋箍住條頸嘅？醫生估計可能係狗狗喺街邊食人食剩嘅飯盒嘅時候搞成咁呀。

真係估唔到一條小小嘅橡筋會搞到流浪動物差啲冇咗條命！大家記得以後食完嘢，做多步，唔好求其箍條橡筋喇，分分鐘救到條小生命㗎。
 

封面圖片、資料來源：高雄市關懷流浪動物協會

延伸閱讀：【慘慘豬】狗仔畀蛇咬到咁樣樣