成日都瞓到最後一刻先起身嘅毛毛，唔好話食早餐啦，有時牙都未刷就要趕返公司喇，唔通下下都back after brush teeth咩！不過咁，如果毛毛條女（即係毛毛老母）可以每朝早餐都整得咁靚畀毛毛食，都應該可以畀到啲動力毛毛早啲起身嘅......

嗱，呢位重慶老母，每日都會整唔同款式嘅愛心早餐畀佢個囡食，唔係普通茶記嗰啲ABC餐公仔麵腸仔煎蛋，而係砌到成幅畫咁，仲話每個都係一個故事嘅早餐呀！佢話希望可以畀到個good morning佢囡囡喎，真係好有愛呀～

等毛毛估下呢個早餐係講咩先，嗯，嗰兩粒橙色的……應該係佢老母應該係想砌個100分出嚟，希望佢個囡考試100分！

而呢個龍的早餐又係咩玩法呀？啲士多啤梨真係砌到成條左青龍咁喎！

唔止呀，仲有呢幅鴨鴨big波暢泳圖，夠詩意喇啩～估唔到餃子都可以整到鴨仔呀下！BTW，呢啲早餐好睇就好睇嘞，但夠唔夠飽㗎？

起碼都好似呢份咁先夠飽肚㗎嘛！睇下～隻熊仔巧打耳呀，畀著毛毛實唔捨得食啦！不過咁，最近天氣咁凍，佢又冇冚被，為咗唔好畀佢凍親，毛毛唯有擺佢入個胃度，畀個溫暖嘅家佢啦！

唉，其實毛毛要求都唔係好高啫，都係想有一個好廚藝嘅女人，每日煮早餐畀毛毛食之嘛，可惜唔好講話女啦，就連毛毛老母都係地獄廚神嚟呀，你叫毛毛邊有動力起身返工喎！

封面圖片、資料及圖片來源：新華網