Yeah！今日又落雨又凍，毛毛都竟然冇遲到多過半粒鐘呀！真係要劏雞還神！不過講真呀，其實都係去燒味檔斬料㗎咋，唔通真係毛毛郁手劏咩，你估毛毛喺強國呢間小學畢業呀？

最近南京有班小三到小五嘅小學雞，跟學校去野外生存營～通常香港呢啲camp，都係跑下圈爬下繩網咁嘅啫，去完返嚟真係會成長咗咩，咪又變返港孩一個～強國呢個就堅揪好多喇，除咗攀岩、搭營，仲要學劏雞呀！

劏雞其實係好多學問嚟，要學劏雞，首先，梗係要有……隻雞啦，所以班小學雞要學捉雞啦放血啦去毛啦處理內臟啦咁。不過就有啲小朋友覺得太殘忍，唔敢睇落去跑開咗。學劏雞又真係血腥咗啲嘅，咁搞法分分有童年陰影㗎嘛，毛毛咁大個仔睇豬囉記公園都仲會尖叫㗎陰公！小學雞，學Laughing Gor咁飲下尿自給自足咪算囉！

不過劏雞呢啲童年陰影，好似都未夠驚嚇呀，香港呢間小學個戶外學習營，竟然係……上堂同模擬面試呀！呢啲先係堅‧童年陰影囉媽咪！

封面圖片來源：江蘇新聞網

資料來源：江蘇新聞網、馬鞍山之友