每當毛毛浪費緊生命嘅時候，就會諗起呢個世界上其實好多人好努力咁過每一日，就好似印度呢位患有早衰症（Progeria）嘅小朋友，由出世嗰刻，就注定比人老得快。

關於呢位小朋友嘅事，毛毛之前都寫過，佢就係Aamir Khan應邀同佢合照，為佢圓夢嗰位小朋友Nihal。

當醫生都估計佢只能夠有14歲命嘅時候，佢冇放棄，好堅強咁生活，就喺呢個一月慶祝佢15歲生日！成為印度最長壽嘅早衰症小朋友。雖然佢比正常人面對更多病痛，返學仲比同學歧視排斥，但佢就好樂觀咁話：「I have never felt that this is a disease, because I'm a special child. 」

積極面對，係佢對抗早衰症嘅態度。身邊嘅人都話，佢同平常嘅小朋友冇分別，都一樣鍾意打機、會關心身邊嘅人，擁有一顆善良嘅童心。

Nihal之前為自己寫咗一張願望清單，佢憑住自己努力同埋唔同人嘅幫助，逐一完成心願。

例如係同跑車合照。

同機械狗玩。

畫好多好多畫。

佢嘅屋企人每一日都陪住Nihal，爸爸話：「無論仲有幾多時間同佢一齊，我只想盡力為佢實現每一個願望。」

面對早衰症，Nihal希望更多人會關注呢一個病：「我希望所有早衰症嘅患者，都可以得到有效嘅治療。」

Nihal，你要堅強，開開心心生活落去，毛毛同大家都為你加油！

好人好事不妨一睇再睇：【人間有愛】印度劉華為早衰症小孩圓夢

圖片及資料來源：Daily Mail