2月有咩大日子呀？咪新年同埋...唉...同埋毒L最唔想面對嘅情人節囉。去拜年實會畀親戚問幾時有女女、2月14日又會畀fb閃到瞎，所以毛毛積極考慮要去日本避世，back after 14/2㗎喇。點知毛毛啱啱發現，東京出現咗情人節專車，裡面仲有「情侶優先座」呀......

呢件事情非常嚴重，搞呢壇嘢嘅公司簡直罪大惡極！查實呢間公司係慣犯嚟，佢哋喺上年已經搞咗個情人節project，但嗰陣只係車頭多咗個心形、車廂入面有啲心形扶手咁。

點知今年仲衰，推出埋「相合席」呀！毛毛9估係「相遇席」嘅意思，強調下緣份呀咁。重點係，原本畀有需要嘅乘客坐嘅優先座，而家淨係畀呢四類人坐：「熱戀嘅情侶」、「一生一世嘅老夫婦」、「有仔有女嘅人生贏家」、「超級好朋友」，即係毒L冇份囉！公平咩？！

唔好以為呢件事唔關你事呀！如果你嚟緊去東京就大鑊喇，呢架車條線係好多香港人會出沒嘅機場線嚟，班負責人仲話搭「特急」會特別易搭中呢架嘢?！

冇咩事毛毛都係返去取消晒啲機票酒店先喇，話時話香港可唔以整個毒L專用關愛車廂呀？

封面圖片及資料來源：trafficnews