老老竇竇，工程嘅嘢，有意外是常識吧，咁有意外咯，就自然有額外收費㗎啦，好出奇咩？

但海關竟然用《商品說明條例》不良營商手法拉咗一間裝修公司嘅董事同職員呀！

毛毛真係戥嗰間裝修公司唔抵喇，都係將本身17 萬嘅單變到78萬咋嘛，貪得嗰少少啫，已經算好有良心啦！仲有呀，動咗工先嚟報價呢樣嘢，高鐵都係咁啦，乜唔係行規嚟嘅咩？海關咁都要拉，仲叫市民小心呢啲先動工後報價嘅誤導式消費，同上面溝通好未㗎？

嘩，啲零仲多過毛毛啲毛毛呀！學港鐵主席馬時亨話齋，如果畀啲工程做做下停落嚟，就會有好多人失業，就會阻礙經濟發展，就會有災難性後果㗎喇！55，真係諗起都打咗個冷震呀！毛毛相信嗰間裝修公司都係為咗社會效益著想先咁樣收錢法啫，希望海關哥哥做嘢可以一視同仁啲，拉埋啲係咁要人批錢畀佢嘅PK就好喇！

封面圖片來源：頭條日報、locpg
圖片及資料來源：頭條日報