如果毛毛有一隻真毛孩，一定會好似對女神咁，承諾愛護佢一生一世！但呢個世界總有啲PK，對啲毛孩始亂終棄，好可惡呀！

其實想養寵物，領養咪得囉，好多地方嘅毛孩都需要溫暖㗎喎，唔一定要買㗎！但呢個離地正苦連人間疾苦都唔知，又點會知啲毛孩喺街度流浪有幾慘喎，學啲膠官話齋，買嘢可以刺激經濟嘛，所以咪擺塊board喺港鐵站度教人點買寵物囉！

其實對啲毛孩嚟講，主人就係佢哋嘅全世界嚟喇，仲忠心過毛毛對女神嘅感情呀！所以一旦唔要佢哋，肯肯定會好似噚日呢隻大埔狗狗咁極速狂奔追車咁追返個主人返嚟呀～

噚日夜晚瘋傳一條片，話個車主好似遺棄咗隻狗狗，搞到隻狗狗追咗佢九條街，但個車主都依然唔肯停車，睇完真係喊出嚟！

愛心爆棚嘅大埔Group網民即刻就嚟咗個人肉搜尋，半個鐘咋，就已經搵到隻狗狗喇，仲有人暫時收養住佢?，真係人間有愛呀！

今朝嗰個畀人鬧咗成晚嘅司機終於都回應咗喇，佢就話隻狗仔唔係佢，係佢親戚嘅，仲話佢去完個親戚屋企，隻狗仔貪玩所以就跟咗佢九條街喇！55，隻狗仔肯肯定係食飽飯冇SSS屙先追佢架車啦！

BTW，就算佢唔係狗狗嘅主人，見到佢係咁跟住自己架車都於心不忍啦，天氣咁凍，仲要喺馬路度跑嚟跑去好危險㗎，畀車撞到點算喎，好在而家隻狗狗冇事咋！毛毛希望呢個世界所有嘅毛孩都可以搵到一個溫暖嘅家（包括毛毛自己），唔使得自己陪住自己啦！

封面圖片來源：Tai Po 大埔/Facebook、動物解放/Facebook
圖片及資料來源：Tai Po 大埔/Facebook、動物解放/Facebook、香港動物報、YouTube、香港01