香港啲小學生日日都喺度學樂器、操TSA嘅時候，一班波斯尼亞嘅小學生都有努力咁學嘢，不過唔係學呢啲，係去學手語。佢哋唔係學嚟考名校，而係為咗可以同一位有聽障嘅同學仔溝通到！

上年新學年，一個叫阿Zejd嘅小朋友升咗上小學，佢每日返學都好唔開心，越返學就越冇自信。因為佢天生失聰，冇辦法同同學溝通，上堂聽書都好辛苦......

本來喺波斯尼亞，一啲有特殊需要嘅小朋友返學嘅時候，會有一個專門幫佢嘅人陪佢一齊上堂。但係佢哋近年經濟唔係咁好，實際上實行唔到呢個制度。

好在，佢班主任即刻搵咗個手語老師幫手，自己學咗之後，仲搵佢教埋Zejd同其他同學，等佢哋可以用標準嘅手語傾偈。

佢嘅一班同學仔唔單止唔嫌麻煩，仲話好開心可以學到Zejd嘅語言，希望以後可以同其他聽障者做朋友，兼且話學識手語第日大個都會用得著呀！而Zejd成個人都自信晒，嚟緊仲會學埋唇語?！

唔止一班同學仔抵讚，其實請手語老師返嚟筆錢，都係一班家長自發夾出嚟嘅，有人畀多、有人畀少，但佢哋都一樣教識咗班仔女為人設想。如果喺香港，可能班家長夾錢請老師之前會問，手語呢科考試佔幾多分呀？

封面圖片及資料來源：DailyMail