而家出街買嘢有時真係唔係幾方便，一兩毫又話唔收，甚至五毫都唔收，咁即係變相加價㗎啫！做咩啫而家，一兩毫唔係錢呀？

毛毛仲見過啲人，摷摷下褲袋跌咗個毫子出嚟之後，竟然連執返都廢事囉！喂喂喂，毫子都係錢，毫子都需要尊重㗎，仲有呀，有冇諗過，香港地仲有唔少人就係靠呢啲毫子堆堆埋埋買餐晏仔食？

最近有網民分享，話喺間快餐店見到坐佢對面位個婆婆拎咗堆毫子出嚟數數數，再搵店員幫佢買個包。個包嚟到嘅時候，婆婆就話，頭先啲錢應該唔夠買個包，想畀返八毫子店員，但網民就留意到呢個店員妹妹可能係私自幫婆婆畀咗嗰幾毫，又唔想婆婆知道，所以顯得有啲不知所措。

隔咗陣，個店員妹妹又拎咗杯暖水畀婆婆，另外仲請佢飲多杯橙汁。幾毫子可能係微不足道，但係只要有心，一樣可以幫到有需要嘅人！本身毛毛經過懲人節嘅洗禮，覺得人生在世灰9到喊，但而家，就覺得由頭warm到落腳趾尾喇～

封面圖片、資料來源：常歡