正所謂新年新氣象，繼早前屯門良景毛啦啦出現好多神秘管理員之後，青衣長發街市都出現咗好多神秘「檔販」呀！佢哋同班管理員一樣，都有慈母愛的加持，令毛毛強烈咁感受到警民關係嘅融洽呀！

毛毛讀得書少，只係知做人最緊要係開開心心，唔明點解領展將街市外判畀同良景一樣嘅承包商，即係建華（街市）管理有限公司，啲小商戶要搞到罷市咁嚴重囉，搞到啲姐姐冇得買餸煮飯點算喎！

好在仲有啲唔知喺邊度嚟嘅檔販入主街市頂一頂咋！其實就算佢哋真係冇商業登記、冇租約證明、冇水電牌、冇食環署相關衛生文件又點喎，最緊要係賣啲嘢夠平咪得囉，理得啲食物喺邊度嚟吖（好似係）！

領展又係貼心嘅，N無神秘檔口唔啱呀？仲有出動免費穿梭巴士叫人去青衣街市買餸?，真係諗起都覺得滾動～

不過班小商戶依然唔肯罷休，仲叫埋婆婆去領展總部要求對話?！

其實領展都係得閒又加下租，得閒又搵下啲神秘管理員嚟管理下地方，但又唔得閒理啲小商戶嘅訴求之嘛，係就係霸道少少，最多咪逆來順受下囉！

封面圖片、資料及圖片來源：長發街市關注組/Facebook