嗱，身為一個專業嘅攝影師，無論咩時候都應該交足功課，費事影衰自己招牌呀嘛～而最近就有對台灣新人專程去日本搵咗間由華人開嘅婚紗攝影公司影相，點知收到啲相之後，嚇到個心都離一離......連新人個fd子都話唔值呀！

嘩！對新人個鋪屎想點呀？套裙褂又想點呀？去日本就咪著褂啦，著褂就咪擺啲咁嘅鋪屎啦......真係錯晒！毛毛係話個攝影師錯晒呀！見到對新人擺呢啲鋪屎都唔阻止佢哋，搞到而家藍藍綠綠嘅背景入面殺出兩點紅......唔係話格格不入嘅，係搶眼咗啲啫......

唉，明明間公司影開啲相都係行開小清新路線㗎嘛，做咩今次咁失手呀，係咪玩嘢先？

影呢輯相嘅公司就喺微博度話佢哋其實只係收咗19萬円（即係萬三蚊港紙左右），淨係會包一日車、化妝師同攝影師......唔L係呀？毛毛覺得收人萬三蚊應該要包埋晚裝禮服、珠寶首飾、執相拍片......最好化妝師同攝影師都各有廿個咁囉！而家真係少咗啲......

然後影得唔好，竟然仲怪個客遲到同揀星期日去遊客區？喂，都係遲咗三個鐘啫，話明主角，大牌少少唔得呀？唔止咁，間公司仲話個客自己準備嘅衫同道具有問題，話佢哋「總是搞出一些奇怪的動作並使用一些很惡搞的道具」呀！

到個客收到相忍唔住投訴，佢哋仲要拉返個客個fd子嚟講！人哋喺側邊用電話影兩張咋嘛，咁就話佔咗佢哋影相嘅時間，唔通你影就得人哋影就唔得嘅咩？唔做得咁霸道㗎下～

唔怪得新人話算數，佢哋班fd子都照戥佢哋唔抵啦！毛毛決定blacklist呢班攝影師，唔畀機會佢哋幫毛毛影結婚相。Er......如果有人肯同毛毛影嘅話。

封面圖片來源：Chang Clare/facebook

資料來源：Foiga寫真事務所/微博、Chang Clare/爆料公社