前幾日＿＿節（唔好問毛毛係咩節，唔想再提嗰兩隻字！！！），除咗啲放閃圖，微博仲瘋傳一張淒美嘅吻別圖，救命呀～放過毛毛啦好嘛？

咦，乜原來鵝都會慶祝＿＿節㗎？唔知點解，毛毛望住張相，突然有種想喊嘅感覺......雖然毛毛未試過同女女分開（冇一齊過又點分開...），但佢哋嗰種依依不捨嘅傷感，毛毛隔住個mon都feel到，真係feel到！而張相瘋傳之後，就有強國網民話呢兩隻難離難捨嘅鵝分開之後仲有後續嘅浪漫故事～

傳中，喺呢對鵝情侶畀人類拆散嘅途中，嗰班可惡嘅人類就發生車禍，但隻鵝竟然冇事，成功逃離咗人類嘅魔掌，沿路搵返自己嘅愛人，繼續雙宿雙棲咁生活落去……嗚嘩，呢兩隻鵝嘅愛情故事真係夠晒可歌可泣呀！

可惜，無論呢個愛情故事幾咁淒美都好，都改變唔到佢哋悲劇嘅命運……其實，呢兩隻鵝所謂嘅吻別，只係隻鵝想幫佢嘅愛人解繩，救返佢出嚟。

可惜事與願違，最後隻鵝都畀佢主人當禮物咁送咗畀佢親戚，之後係點都唔使毛毛畫出腸啦，而留低喺度嘅嗰隻鵝亦都……不要再說了.jpg

封面圖片來源：深圳李寬/微博、overseaswindow
資料及圖片來源：深圳李寬/微博、overseaswindow、華夏圖片網、大河報