當一個人遇到難題嗰陣應該要點做？梗係即刻向FB大神求助啦！今次佢成功幫一封信搵返主人呀！

話說24年前有個英國男人寫咗封信，然後放入玻璃樽度，頭也不回咁扔咗出海。毛毛讀書少，9估上面大概係寫住：「如果你執到呢封信嘅話，就唔該寄返畀我啦！」通常呢啲信，就好似毛毛send畀女神嘅WhatsApp咁，永遠都唔會有人應機，沉晒落海都冇人理㗎啦！點知24年後嘅今日，封信竟然物歸原主呀！

原來有人喺滑浪嗰陣，毛啦啦執到呢個裝住信嘅樽，諗住放上FB呃下Like啦，點知畀人傳傳下，傳返去個主人度！嘩係奇蹟呀！不過呢，主人就話，其實已經唔記得寫過呢封信喇，當年只係因為貪玩，估唔到會發生啲咁神奇嘅事。

因為呢封信，佢哋約咗大家見面，唔知會唔會又係一個愛情故事嘅誕生呢，hehe！不過呢個故事講咗一個大道理畀毛毛聽，就係女神終有一日會覆毛毛㗎，只係時間問題啫！一定係，55！

封面圖片及資料來源：walesonline