如果貓貓走失，呢個應該係畀人類嘅試鍊嚟，搵我啦！貓奴！不過有隻伊拉克貓貓喺希臘走失，經過咗德國，最後去埋挪威先搵得佢嘅貓奴，真係辛苦晒喇。

呢隻貓貓叫Kunkush，喺伊拉克大冇咩見過世面，但佢三歲嘅時候就同班貓奴做咗難民，向挪威出發......

班貓奴諗住去到挪威就可以繼續服侍主子喇，點知經過希臘一個小島嗰陣，Kunkush佢可能見咁多貓貓同伴喺嗰度，就玩失蹤想留耐啲～班貓奴搵唔返佢，唯有照去挪威呀。

雖然Kunkush成功撇低貓奴，不過佢就唔係幾適應流浪生活，仲畀希臘啲貓貓蝦，佢嗰陣應該好掛住貓奴喇......咁啱動物組織嘅人發現咗佢，一睇就知道佢係外國貓，所以幫佢開咗個fb page尋貓奴呀！

動物組織嘅人斷估啲貓奴都係去咗歐洲㗎喇，所以就喺page度籌錢買機票送咗Kunkush去德國等消息～

個page就keep住用嚟搵貓奴，喺隔咗大概兩個月之後，終於搵返班去咗挪威嘅貓奴喇！

隔咁遠都順利搵得返，網絡嘅力量真係勁呀，唔知毛毛開返個page又會唔會搵得返失散咗廿幾年嘅女朋友呢......？

封面圖片及資料來源：Reunite Dias