毛毛平時扮工冇嘢做，最鍾意就係諗下啲發達大計，加快少少咁多個上樓速度吖嘛！而台灣有個得十歲嘅小妹妹都話要賺錢，不過唔係為自己為上樓，而係為咗佢老竇呀！

噚晚呢個爸爸喺網上開post，話自己望住啲月結單頭都痛埋。佢個囡囡見到竟然問佢：「爸爸，畫圖係咪可以賺錢㗎？」當時爸爸仲以為個囡係講緊想做畫家，於是就hea應佢啦。之後囡囡就再問：「咁line嘅貼圖係咪都可以賣錢㗎？」

介紹返，line入面有啲貼圖係要用錢賣㗎！香港人比較少用，但台灣呀日本呀呢啲地方都幾常用嘅～

咁呢啲貼圖同個妹妹有咩關係呢？原來佢係見爸爸咁苦惱，於是想畫一套line貼圖出嚟賺錢，幫輕下爸爸呀！嗚哇，有冇咁生性呀？

嘩，一套貼圖有成32個，仲要有唔同表情唔同句子，誠意之作嚟㗎喎！成班網友見到張相之後都叫個老竇快啲將個貼圖真﹒上架，話要幫襯咁話喎！唉，個女仔細細個就咁識諗，搞到毛毛都有少少少少咁多內疚?……最多呢個月買少幾個figure，課少幾次金囉，咩喎。

封面圖片及資料來源：爆廢公社