之前同大家開心些牙過個火爆老竇轟爛阿仔部PSP嘅片（【有片】阿仔打機太嘈 火爆老竇一嘢轟到部機稀巴爛），唔知點解，呢啲片對工作壓力咁大嘅毛毛嚟講，真係好治癒！又唔使自己出手，但都睇到好爽皮！今日，毛毛又要同大家介紹另一條破壞系列嘅片喇！

著住sharp醒橙色衫嘅男人一開頭就拎住個有佢對腳咁高嘅大雀籠舞嚟舞去，又講咗幾句嘢咁，點知跟住就開始唔知發咩癲，企起身大大力咁跳落個籠度狂踩喇！佢跳呀跳呀跳，個雀籠就畀佢踩到變晒型，成個柿餅咁喇！

企佢隔籬嘅白色鸚鵡一見到，即刻激動到爆晒粗，毛毛好似聽到佢狂叫「Fxxk！Fxxk！$%*^%$&^&」咁呀！唔通佢係見自己個安樂窩畀人踩爆咗，所以咁嬲嬲豬？

有冇搞錯呀，個男人無啦啦踩爆人哋屋企，仲要喺鸚鵡仔面前咁做，咁咪即係鳥目前……嗚呀，唔好誤會呀，原來佢咁做係有原因㗎。呢個雀籠之前係畀一隻叫Jojo嘅綠色鸚鵡住嘅，佢因為長期住喺入面，所以得咗心理同神經病呀。

而個火爆男人都唔係癲佬，而係加拿大鸚鵡救援中心(Saskatoon Parrot Rescue)嘅義工！佢話呀，圓形嘅雀籠其實係唔啱雀仔住㗎，因為佢哋本嚟喺大自然嘅角色係「獵物」，一定要有地方畀佢匿埋先有安全感㗎，但係圓形雀籠就冇角落頭畀佢匿埋，好易搞到雀仔精神緊張，有心理病㗎，相反，方形嘅雀籠就好好多喇。

原來白色鸚鵡爆晒粗係想鬧個圓形雀籠衰衰呀！毛毛今日真係學到好多嘢呀～

封面圖片、資料來源：YouTube、Saskatoon Parrot Rescue