毛毛終於明點解啲妹豬要一路行街一路做低頭族，就算撞到人都要狂撳電話喇，原來佢哋係每見到一樣想買嘅嘢都要問下仔仔意見呀！

話說有個台灣網民話自己最近好忙，陪唔到女女，所以佢女女就成日去濕平嚟填補自己空虛寂寞凍嘅心，不過都因為咁而搞到佢哋嗌交喎～睇開啲啦巴打，佢唔係碌你張卡嚟濕平已經還得神落……

呢個女朋友又好似幾尊重男朋友意見咁喎，買咩都問仔仔鐘唔鐘意先～佢問仔仔買白色BraBra好唔好呀……畀著毛毛係個男朋友，實覺得好sweet咩都話ok啦！咁pure咁true，初戀feel呀嗚呀！點知仔仔竟然話似剝殼椰子…… 浪漫啲好冇呀。

一句話撻著女友冠軍，就係呢句「剝殼椰子」喇！妹豬即刻嬲到鬧仔仔對佢想買嘅嘢都有意見呀，仔仔咪唯有出盡飲奶嘅力氹返妹豬囉！不過話自己鍾意飲椰子汁又真係……嗚呀搞到毛毛紅都面晒，而家啲後生真係世風日下道德淪亡呀下。

咁都唔止呀，佢仲唔識死，話個白色BraBra似哈蜜瓜?呀！仲有圖有相，驚妹豬話佢吹水喎。你係永遠嗌唔贏自己女朋友㗎OK？

女人嘅物慾，係無窮無盡嘅。唔畀買BraBra，咪買包包囉～佢send咗張cap圖畀仔仔，不過今次佢已經講明唔想聽仔仔意見喇！點知個多口仔死都要強行畀意見！仲話個黑色書包好似哈利波特頂分類帽呀！

最後，佢就好成功咁激嬲咗女朋友喇yeah！佢終於都明白到，當女人問你件衫靚唔靚嘅時候，無論如何都要拍手叫好嘅大道理。不過都實在太遲喇，毛毛十年前已經明白「女人問咩你都要話好」嘅真理囉，不過係毛媽問「今晚食菜心同煎魚好唔好」咋嘛……

封面圖片、資料來源： PTT