有冇Lego迷喺度呀！ Lego唔只係積木，仲係會一齊成長嘅好同伴！ Lego最近宣佈，嚟緊6月會推出新嘅「Lego City」系列，有住家男同傷健人士公仔同大家見面呀！

通常細個嘅時候上美術堂話要畫媽咪，就實係畫個著圍裙、拎住鑊鏟嘅女人嘅，要畫爸爸，就會畫個打著西裝去返工嘅男人～

不過時代唔同喇，而家媽咪可以係事業女強人，Daddy都可以係住家男嘅啫！呢個Daddy推住BB車真係好charm呀，嗚呀，毛毛好想做個BB畀佢推呀！

除咗住家男，Lego仲出咗傷健人士?！Lego話推出呢啲新公仔嘅原因，係想呈現我哋嘅現實世界（簡單啲講即係貼地啲呀）～

之前英國有位半失聰女士就喺網上發起「toy like me」運動，提倡玩具公司要照顧傷健小朋友嘅感受，出啲傷健人士公仔～今次Lego咁做，佢就話覺得好開心可以鼓勵到全球1.5億傷健小朋友嘅心靈喇！毛毛個心都覺得好warm呀，決定由而家開始一路砌Lego一路扮工十卜下佢哋先得！

封面圖片、資料來源：英國《每日郵報》