毛毛最大嘅願望梗係可以成世都匿喺屋企做廢青啦，咁咪唔使落街咁麻煩囉，衫都唔使換?呀！可能遠在東洋都有好多女女同毛毛有同一個夢想（嗚嘩，點解毛毛唔喺日本出世呀！！！），所以就有咗呢件小清新睡衣橫空面世喇！

你以為佢只係一件普通睡衣咁簡單咩，咁你就錯喇，其實佢係一件專為宅女而設嘅睡衣！

首先佢遮晒成塊臉得一個窿嘅設計，主要係方便返宅女食嘢同埋瞓覺嘅。至於佢點睇路喇喎，Er ……其實呢方面又唔使擔心嘅，話明宅女吖嘛，都唔會出街㗎啦！

呢件衫仲有另一個貼心嘅設計就係屎忽位有條拉鏈，一拉，褲都唔使除，就可以開大開細喇，非常方便！

廠商仲聲稱如果入面係真空嘅話（毛毛承認打到呢度有啲面紅），會有種難以言喻嘅解放感㗎！

BTW，其實呢件衫嘅淨色純棉質料設計，同偽文青經常著嗰啲森林系都有幾分相似吖，毛毛強烈建議啲偽文青都可以買返套，咁樣影相呃like、呃wow或者呃love都得啦！嗱喺室內影得！

喺沙灘影又得！

喺南生圍影亦得，得咗！

WoW，無論係咩背景都好，只要著咗呢件小清新睡衣，加埋Filter，陣文青味即刻出晒嚟呀！如果佢唔係女裝，平日著開U記嘅毛毛都想買返件擺喺屋企呀，不過唔緊要，等毛毛都即刻買返件畀毛毛女人a.k.a老母著先！

封面圖片、資料及圖片來源：inside-games.jp、stallonetam/ flickr、PapaPiper/ flickr、popular-carpenter