老老竇竇，毛毛都幾鍾意釣魚㗎！貪佢唔係團體活動，一條友都做到吖嘛……嗚！今日就畀毛毛見到個世界級嘅釣魚神人，隔住個mon都feel到佢陣霸氣出晒嚟呀！

有台灣網友坐船嘅時候驚見個海上面好似有個人坐喺度呀！唔會嘅，幻覺嚟嘅啫！嚇我唔到嘅！肯肯定係架洗頭艇揸得太快，眼花睇錯啫！

點知再駛近啲嘅時候，個網友終於睇清楚，原來係真﹒人嚟㗎！即刻嚇到個心都離一離！但呢個阿叔似乎驚都未驚過，氣定神閒咁繼續得正正喺大海中間釣魚。問題嚟喇，到底佢係點做到嘅呢？

話咁快就有天才網友跳出嚟解釋，話原來個阿叔只係坐喺啲水泥平台上面，咁啱潮漲淹過咗個台，所以就有阿叔輕功水上飄嘅幻覺囉！點都好啦，得佢一個好似喺大海飄流咁但仲可以咁淡定釣魚都真係唔嘢少，請受毛毛一拜呀！

封面圖片及資料來源：爆料公社