你見毛毛成日都寫貓貓畀你哋睇，就知毛毛有幾想屈服喺貓星人嘅淫威之下，做隻聽聽話話嘅貓奴啦～不過毛毛連自己都養唔起，又點養得起貓星人喎，所以平日都係對其他人嘅貓貓上下其手算喇！呢位網民應該都同毛毛一樣有鋪非禮貓貓嘅癮，但點知今次佢畀人喝止咗呀！

估唔到日本有貓貓做站長，香港都有貓貓做動物工作員喎～喺呢間精神健康綜合中心，就有三位貓同事，佢哋仲有分高級、初級同見習?，又好似幾專業咁！

唔單止有title呀，佢哋連卡片都有㗎，真係十足一個員工咁！咁又係嘅，如果啲貓貓係同事嘅話，又真係唔可以話摸就摸嘅，正如毛毛都唔可以掂女同事啦（拍下膊頭都嗌非禮呀）！不過如果雙子塔有貓貓同事嘅話，毛毛一定會長期駐守喺公司㗎！

毛毛有打過去間社福機構問過，嗰度啲姑娘話平日啲貓貓主要係負責安撫會員嘅情緒，等佢哋可以有多啲正能量呀！貓貓嘅力量咁強大，毛毛淨係隔住個mon，都感覺被治癒了，相信嗰度嘅會員一定可以好快治癒㗎！

封面圖片、資料及圖片來源：Gary Charm/Facebook