唉，而家呢個市道真係搵食艱難，毛毛又中唔到六合彩喎，咪冇錢買樓囉，咁啲地產經紀咪自然冇單開囉，又難怪佢哋會火爆啲嘅。

早排之嘛，紅磡地鐵站就上映咗齣《葉問上身之地產經紀怒打地鐵職員》嘅動作鉅片，打到個地鐵職員瞓晒身咁趴咗喺地下呀，從佢拳拳到肉嘅狠勁都睇得出，做地產經紀真係好L大壓力㗎！

前日班進擊嘅地產經紀又有新搞作喇，不過今次佢哋就唔係表演武打，而係喺馬路上面玩Running Man截車拉客呀！嘩，你睇下佢哋唔理生命危險咁跑呀跑，就知道佢哋為咗傾成一單Deal嘅決心啦！

等毛毛睇下佢哋可唔可以成功完成任務先，從下面段片入面可以睇到佢哋成功截住一個boss，不過睇嚟呢個boss嘅防禦力比較高嘅關係，一句「行開啊，我唔買樓啊」就成功KO咗班螞蟻嬲蜜糖嘅地產經紀喇！哎唷唷，真係慘豬咯，不過佢哋屢敗屢試嘅精神，毛毛都好佩服呀，所以毛毛決定要好好學習佢哋嘅精神……去買多幾次六合彩先！

封面圖片、資料及圖片來源：鳥溪沙路/Facebook