毛毛雖然膽生毛，但如果你叫我細個嗰陣去玩過山車，我都會驚㗎！而且香港嘅大海公園同埋迪迪尼都有高度限制，唔夠高就唔畀玩啲危險嘅機動遊戲，所以毛毛小朋友嗰陣都只係去坐下啲小火車就當玩咗囉。不過強國人最近就再一次突破盲腸，竟然喺個兒童公園入面提供坦克車畀小朋友玩呀！

啲坦克車雖然係仿製，但係都一樣識行識走，機動性非常之強，車身仲裝有炮彈，肯肯定適合一班心智未成熟，身體又未發育嘅小朋友玩㗎！

會有呢幾部坦克車嘅原因其實都係因為呢個兒童樂園最近搞咗個叫「開著坦克炮，收復釣魚島」嘅活動，所以你見啲車上面都印住解放軍嘅字樣，啱晒一班愛國同胞帶埋佢啲囝囝囡囡去玩呀！順便可以同佢哋灌輸愛國思想，等佢哋大個唔使做廢青！

不過一班強國嘅怪獸家長就話啲坦克車太大部，驚會發生意外喎！傻豬嚟嘅，生活得喺強國居然仲擔心呢啲雞毛鴨蒜嘅事？嗱毛毛就驚都未驚過喇！事關，我根本都唔會返去……

封面圖片及資料來源：環球網