2016年03月03日 星期四
【冇名嘅？】禮義廉做乜派利是派得咁鬼祟？
古乳有暈，豬欣莫望報，呀唔係唔係，施恩莫望報呀嘛～一向都瞓晒身為市民服務嘅禮義廉就以身作則，教大家呢個咁有親切感嘅大道理喇！
話說呢，有個讀者近排收到張宣傳單張，話住劏房嘅朋友仔可以收到100蚊利是呀～雖然100蚊喺香港地唔係可以買到好多嘢，不過都覺得好warm呀！咦但係張紙冇名冇姓嘅？點知要搵邊個先拎到封大利是呀？唔通係匿名慈善家？
呀～唔使驚～好彩信箱仲有另一張宣傳單張啫！睇下先，呢張宣傳派米嘅，有寫住係禮義廉搞㗎！等大家要多謝都知道多謝邊個呀嘛！咦，下面個地址同派利是張宣傳單張一樣嘅喂？做咩明明派利是畀人咁偉大，都唔寫明係禮義廉呀？
之前爭取兩張櫈都大大張banner寫出嚟威威啦，而家究極蛇齋餅糉咁大件事，點可以只係出張連名都冇嘅紙仔就算㗎！派利是都派得咁鬼祟，唔係唔係，幫人都幫得咁低調，果然係有禮有義有廉嘅禮義廉呀！
＜禮義廉實事回顧＞
