有讀者經過港鐵見到呢個告示，豬同香燭都唔畀入閘喎，當堂嚇一跳，乜原來港鐵連拜山都唔畀㗎？

毛毛心諗吓而家港豬都唔可以搭地鐵？呀咁都幾好喎以後放工時間一定有位坐喇。不過睇真啲原來唔係呀，係清明節拜山嗰啲燒豬都唔得呀！

毛毛即刻打去同港鐵職員了解了解，職員話燒豬乳豬香燭祭品都唔帶得入港鐵，燒豬都話可以係人咁高會超過行李限制啫，但係乳豬都唔得喎，佢話係因為會影響乘客呀！香燭祭品就話會易燃喎，唔點著都會被勸喻咁話呀。佢仲話呢個告示唔係今年先出㗎喇，近清明節就會棟出嚟喎。

終於明點解楊琴同大提琴都唔入港鐵喇，因為木都係燒得著㗎嘛！香港人連做孝子都唔入得港鐵，乳豬都唔拎得，不過呢之前有水貨客運生猛龍蝦又得喎，都係紅色啫，下次帶隻龍蝦去祭祖囉。
嗱毛毛教路，清明拜山嗰時咁樣包裝，就會過到㗎喇。

記得同班minions講：「走水貨返地府啫，通融下啦。」肯肯定入到閘啦！

圖片來源：Lee Ming Fai/香港突發事故報料區