眾所9知，年初一二三發生嘅「良景邨小販衝突事件」到而家為止已經過去咗一個月，喺呢一個月入面，嗰班「管理員」好似已經冇再出現過，而一眾小販都開始如常擺檔，咁到底傳說中嘅良景宵夜有咩食㗎呢？而家就等毛毛同大家睇下！
粟米餅、韭菜餅（2塊／$12）
咬開呢兩塊餅，見到入面係勁足料，雖然塊餅係煎過嚟，好多油，但因為入面有好多粟米／韭菜，所以食落都唔算好油膩。另外阿姐仲會問你要唔要酸辣醬，毛毛咁重口味......梗係要啦仲使問！
鐵板炒麵（$37，包兩餸）
兩個餸配一個麵，毛毛今次就揀咗豬頸肉、叉燒同烏冬。揀完之後，阿姐仲會問你要唔要洋蔥同生菜呀咁，雖然呢檔幾旺下，但阿姐都好快手，三兩下手勢就炒好個烏冬畀毛毛嚕～一開盒見到個賣相都OK，份量都好夠，不過如果要毛毛用一句說話嚟講嘅話，毛毛會話茶餐廳價錢買到茶餐廳水準嘅嘢，55。
章魚燒（6粒／$22）
呢個章魚燒同上面賣粟米餅、韭菜餅嗰檔係同一檔嚟，雖然個章魚燒就畀毛毛用竹籤整到佢咁樣樣（sorly呀，冇心㗎），但味道都算幾好，啱晒毛毛呢啲鍾意食沙律醬嘅人。
貞姐糖水（1碗／$20）
其實良景係有幾檔差唔多樣嘅糖水檔，但人人都話要試嘅就係「貞姐糖水」！！！檔口有廿幾三十款材料畀你揀，例如有唔同嘅生果、唔同味嘅爆爆珠、涼粉、黑白珍珠、椰果等等，裝到個碗滿為止！嗚呀，毛毛真係唔敢相信呢碗啲料滿到瀉嘅糖水都只係廿蚊，想知有幾多料？睇噚晚毛毛post喺毛記挨豬呢條片就知：
睇埋良景市集（即係翻新過後嘅良景街市）有咩食，請撳下一頁～
嘩嘩嘩，相比起另一邊嘅小販檔，呢邊真係擰些BU同！睇下，啲裝修幾豪華，仲有櫈仔坐𠻹，嗯，淨係食個裝修都抵到爛啦。即刻睇埋有咩食先～
汁燒原隻魷魚筒（$28）
大嗱嗱成28蚊一個汁燒原隻魷魚筒，食落個汁甜甜地、鹹鹹地咁，都唔錯嘅，不過可能因為毛毛本身鍾意食啲硬身嘅嘢啦，毛毛覺得呢個魷魚筒可以再燒耐啲，如果個邊可以再脆少少，咁就更加好喇～
雞軟骨串（$9）、牛柳粒串（$18）
呢串雞軟骨食落有咬口，又幾惹味咁，重點係佢只係賣9蚊（真係好難搵到10蚊以內嘅串燒㗎！），所以相當抵＿！另外，其實食牛柳粒串燒係好易中伏，一係就太生，一係就燒得太耐啲肉太老，良景市集呢檔都燒得唔差嘅，起碼毛毛唔覺得啲肉「鞋」先～
椒鹽魷魚鬚（sor9，真係唔記得幾錢）
椒鹽魷魚鬚毛毛平時都食唔少，呢間係比較乾身啲嘅，um......如果用佢嚟送啤酒都係一流嘅，因為......有啲偏鹹。
btw，其實仲有唔少嘢食毛毛係未試嘅（一條毒L冇咁多個口呀），你哋自己去發掘啦下，發掘路線：
1）搭巴士58M、58X喺良景邨巴士總站落車，再過條馬路
2）搭輕鐵507、505、615、615P喺良景站落車
