毛毛就唔係好明啲女人喇，開心又食朱古力，唔開心又食朱古力，其實想食咪食囉，做咩要畀咁多藉口自己喎，食完又要驚畀其他女人話肥喎，計毛毛就話，係靚女嘅，食極都唔肥啦！不過有外國勢力可能睇準女人隨時都想食朱古力嘅心態，竟然整咗個聲稱係全球首創嘅朱古力茶壺喎！
呢個朱古力茶壺最把炮嘅地方就係成個都係用58%嘅黑朱古力整，只要加一加熱水喺入面，就即刻可以沖出一杯濃郁嘅熱朱古力喇！又或者當係朱古力火鍋咁，拎啲水果點嚟食亦得，得咗！

不過咁，呢啲嘢全部都要喺呢個朱古力茶壺溶之前做㗎～話明堅係朱古力做㗎嘛，梗係會溶啦！

唔小心溶咗咯，咪食咗佢囉，不過咁大個茶壺，要食晒都咪話唔膩呀～不過對於啲女人嚟講，食呢啲甜嘢通常都有第二個胃啦～分分鐘遲啲有埋朱古力杯麵、朱古力罐頭、甚至朱古力廚具套裝?呀！諗落其實都幾方便吖，食完啲嘢，食埋啲廚具，咁咪可以連洗嘅都慳返囉！

封面圖片、資料及圖片來源：Daily Mail