偷偷地話你知呀，毛毛成日都諗返起以前讀大學嘅日子㗎～八半堂？梗係唔上啦傻的嗎，瞓醒咪踢對拖落去食個lun廚，跟住梗係返去上堂啦，乖乖仔嚟嘛，不過成日唔小心飯氣攻心瞓著咗啫～落堂又去食個靚tea，之後返hall hea下，打機打到三四點先瞓，第二朝？咪又走堂囉～諗返都爽呀，點似得而家日日都要返工咁攰呀？

不過其實諗諗下，又真係唔知呢啲生活有乜謂㗎，好似hea hea下就過咗幾年咁～台灣有個fresh grad，都好似毛毛咁諗呀！佢喺論壇寫咗篇千字文畀仲讀緊書嘅大學生，勉勵佢哋要畀心機讀書！佢第一句話「不是爛學校把我變成智障，是我將自己墮落成廢物」已經夠晒震撼毛毛嘅心靈，唔通佢入咗黑社會浪費晒自己嘅時間？！

點知原來佢讀大學嘅四年，唔係做飛仔，而係只係做緊啲你都可能做緊嘅事：走堂、臨考試先溫書、出貓、考完就還返晒畀阿Sir…… 最後就見工嘅時候先知自己嘅大學生涯乜都冇學過，白白咁過咗！

叫人畀心機讀書嘅說話，聽過幾千萬次啦，而佢嘅真心話，雖然唔係用英文講，但都真係講得好感人好真心！如果毛毛可以再讀過一次大學，一定會畀心機上堂，唔做free rider（最多做semi-free rider），唔再走咁多堂（淨係走八半）！

好喇認真喇，返過工就知，其實讀書真係成世人最開心嘅時間，要上堂溫書梗係辛苦啦，但開心嘅係可以有成班同學仔一齊玩到個課室反轉嘛！記住呀，讀書唔係唔重要，不過都唔係最重要，好似上面個Fresh Grad咁講，如果搵唔到讀書嘅樂趣，就試下全情投入你嘅夢想啦，世界好大，唔好諗埋一邊呀，學生哥。

封面圖片、資料來源：Dcard