毛毛細個玩井字過三關成日輸畀電腦，以為自己好廢啦，點知呢排個個都講圍棋大戰，人工智能AlphaGo仲三連勝咁屈機，毛毛先知可能唔係自己廢，係電腦勁啫！不過原來開發AlphaGo嘅哈薩比斯(Demis Hassabis)都係咁屈機！

39歲嘅哈薩比斯1976年喺倫敦出世，係國際象棋神童，13歲就有大師級水準，16歲就高中畢業。根據我哋對成功嘅定義，之後一定係入大學啦！Sorly，佢冇入大學，而係入咗間遊戲開發公司度做，整咗隻經典Game，叫《主題樂園》(Theme Park)。

毛毛未介紹完㗎！之後佢又突然讀返書，喺劍劍劍劍劍橋大學讀電腦科學，22歲畢業後就開咗自己公司Elixir Studios，仲連續5年拎到世界智力遊戲奧運會「智力運動會」嘅冠軍?！

天才嘅諗法你又點會明吖，到2005年佢又執咗間公司讀返書，今次讀認知神經科學(Cognitive Neuroscience)嘅博士學位。佢對記憶力嘅研究仲獲國際學術雜誌《科學》選為「世界十大科學成果」。

當集合咗遊戲專家、電腦專家、同神經科學專家於一身之後，佢喺2011成立「DeepMind」公司，研究人工智能系統，三年後就畀Google收購咗。

毛毛講到呢度，好想大叫公平咩！！！不過毛毛日日返工都好開心，鍾意back after lunch就back after lunch，係仲未有女朋友啫⋯⋯

圖片及資料來源：朝鮮日報、自由時報