據毛毛做咗廿幾年兵嘅經驗嚟睇呢，每個毒L嘅心深處，應該都係一個奴才，如果唔係點會畀女神任勞任怨吖！嗱，老老竇竇，唔係毛毛得個講字㗎，最近英國就有間公司搞咗個堅毛孩破壞王比賽，冠軍得主嗰隻喵星人雖然得9個月大，但就破壞力驚人，已經整爛咗佢奴才價值2000英鎊，即係大概2萬鬆啲港紙嘅傢私喇！睇下佢個得戚樣，真係好大嘅貓威呀！

大嗱嗱兩萬銀傢俬就咁報銷，不過唔緊要，呢個比賽係有500英鎊做獎金嘅！但似乎就冚唔返條數喇，55，都好過冇嘅……主子就係主子，就算佢整爛晒全間屋，奴才都應該感恩佢冇整爛埋自己先係嘅！

其實唔單止喵星人有咁強大嘅威力呀，汪星人都唔弱㗎！亞軍得主嘅呢隻臘腸狗，咪睇佢腳短短咁，佢已經成功將屋企啲牆壁都咬爛晒，坐墊、地毯、碗、木條甚至用嚟煮晚飯嘅餸都畀佢搬晒去洗衫房。

至於季軍嘅得主呢，都係汪星人嚟嘅，佢嘅戰績毛毛都唔使多講，自己睇相啦！

唉，佢哋啲主人畀佢哋屋企嘅毛孩搞到咁，毛毛都覺得佢哋係慘嘅，不過查實毛毛仲慘呀！人哋又係毛孩，毛毛又係毛孩，點解同毛唔同命，人哋就係主子，毛毛就成世都係奴才喎，公平咩？嗚嗚。

封面圖片、資料及圖片來源：terrysfabrics