啲女同事成日都同毛毛講，識煮嘢食嘅男人係會加分，因為呢句說話，毛毛決心要成為毛記占美奧梨花唔識串，自製咗呢個驚天地泣鬼神嘅──登櫈，韓式激濃芝士杯麵呀！！！！！！

首先話明韓式吖嘛，梗係要有一個韓式杯麵啦！但如果只係煮個杯麵咁簡單嘅，就太悔辱毛毛苦練多時嘅廚藝喇！

55，材料仲有牛奶同芝士嘅！（咩牌子都唔緊要嘅，毛毛都係隨心㗎咋！）

首先呢，就要落熱水煮個麵2分鐘，啲水要蓋個麵喎～而喺同一時間，就要用微波爐叮熱啲奶，大概用高溫叮1分鐘左右！

遺憾嘅係毛毛實在係太粗心大意唔記得睇火，包奶就射到個微波爐周圍都係……（已經清潔返啦嗚嗚，對唔字腦細.......）

OK….由於包奶已經用自己方式射到奶盡而亡嘅關係，奶呢part毛毛就skip咗佢喇～但嘢始終都係要食嘅，我哋返返嚟杯麵現場繼續煮先！2分鐘之後，就倒咗啲熱水，加埋隨杯麵附送嘅韓式醬料，就好似咁～

之後呢，就可以加埋呢道菜嘅精華，就係芝士喇～毛毛就想啲芝士味濃郁啲，所以就打孖上！

之後再擺返入微波爐用高溫叮30秒（記得睇火呀），等啲芝士溶溶哋嘅時候，就可以用你嘅神之手，紮好個馬，撈撈撈撈撈撈撈……跟住就大功告成喇！（跳起Yeah～）

毛毛仲搵咗慘盈BB試食，平日話自己會食辣會食到喊喊豬嘅佢都忍唔住話個麵好食，仲讚毛毛嘅廚藝高超?～

連慘盈BB都讚，證明毛毛嘅廚藝有返咁上下質素啦！BTW，毛毛有勁共嘅政治立場，可惜就差緊個外父嘅加持啫，如果唔係毛毛一早就開咗鋪頭啦～

封面圖片、資料及圖片來源：毛毛’s手機