返咗工咁耐，毛毛真係好掛住以前著住套校服又pure又true咁返學嘅日子呀，可惜我的青春小鳥一去不回頭啦…… 嗱，係掛住返學咋，唔係掛住上堂呀。上親堂，成班同學仔唔係覺覺豬就傳紙仔嘅（係呀以前邊有得Whatsapp啫）～

你哋班學生哥就有堂都唔想上呀，但有冇諗過喵星人其實不知幾想返學呀！台灣有個貓奴話自己每日出門口嘅時候，都會畀主子嘅眼神萌到佢唔捨得走，而搞到遲到呀！

咁麻煩，佢有一日，終於諗到條絕世好橋喇！就係帶埋貓貓返學呀！其他同學個個都一係走堂一係玩電話，得貓貓一個最專心上堂咋陰公…… 畀老師見到都唔知笑好定喊好喇。

放咗學，梗係都要做下功課，體驗下繁忙兒童有幾繁忙啦。不過做到咁樣樣就…… 又幾似毛毛以前喎。

封面圖片、資料來源：dcard