嗱後生仔，咪話阿叔唔教精你呀，做男人呢，最忌就係執二攤，不過如果係呢種「執義攤」呢，又唔拒喎！

最近有班學生哥自發搞咗個叫「執義攤」嘅活動，唔好以為只係義賣下舊書舊嘢咁簡單呀，呢個其實係一個又環保又慈善，仲可以幫到拾荒長者嘅活動嚟㗎！

首先，班學生哥喺三月份已經收集咗大家捐嘅物資，四月就會憑感覺揀啲比較受歡迎嘅物品喺facebook度拍賣，跟住就會約埋義工朋友一齊去深水埗午夜墟用平價賣埋其餘嘅物品去～最後，亦都係最重要嘅環節，就梗係用收到嘅錢嚟買超市禮劵，送畀拾荒長者啦。

班廢青用自己方式幫到有需要嘅老人家梗係抵讚啦，不過佢哋個活動，其實仲想提醒下大家，有用嘅嘢先好買，減少浪費～事關佢哋收到嘅物資入面，竟然有成超過50隻錶同廿幾套全新廚具呀！又幫到老人家又環保，抵讚呀下！

封面圖片、資料來源：JumbleSale【執・義・攤】

延伸閱讀：【街頭變櫥窗】深水埗暖心街店畀街友自己揀衫