聽毛毛老竇講，當年佢就係同老母講咗句：「如果你沒有時間跟我談情，就請你跟我去露營！」就搞掂咗老母喇！毛毛唔知呢條橋而家仲work唔work，亦冇邀請過女仔去露營，但估唔到而家啲人去露營，竟然係帶埋酒店嗰啲拖鞋呀、枕頭呀、牙膏牙刷咁去露營喎！

咁本來畀完錢住酒店，拎走埋人哋啲牙膏牙刷都好閒嘅啫，之但係可能毛毛見識少啦，拎埋人哋啲枕頭都係第一次見，仲要拎埋去露營?！呢種以自己方式住酒店嘅方法，真係令毛毛大開眼界呀！

不過露營還露營吖，咪以為帶咗啲酒店用品嚟用就以為自己真係住緊酒店先得 㗎，冇room services㗎！雖然佢哋係有將啲枕頭呀被呀擺喺垃圾筒，但喺郊外地區嘅垃圾N年先收一次是常識吧！同埋咁大嚿垃圾，有冇諗過收垃圾啲姐姐感受呀？

仲有呀，將啲牙膏牙刷周圍扔，似乎佢哋真係當正自已住酒店咁喎，有冇公德心呀？

唉，搞到啲地方污糟晒，香港嘅郊區真係多得呢啲人唔少呀！露營露得咁爽皮，扔到周圍都係垃圾，難為之後嘅人要喺垃圾堆中露營呀，其實去完郊外地方袋返自己啲垃圾走是常識吧，唉不如你都係返返去住酒店啦！

封面圖片、資料及圖片來源：Ronin Roy