人類總是犯賤的，就好似強國河蟹《十年》，反而搞到同胞們瘋狂download咁咋嘛，你愈係唔想畀人睇，人哋就愈係死都要搵嚟睇！聽講最近Gucci有個新廣告都喺英國禁播呀，唔知是咪因為有三級畫面呢……搞到毛毛都心思思想搵嚟丁下呀……咩呀，毛毛學下點拍廣告，小心啲唔好犯錯咋嘛。

個廣告係影班後生仔女一齊著晒靚衫喺間靚屋入面開party跳舞嘅，條橋聽落都幾正常呀～啲畫面又靚，好似冇乜問題呀～呀，不過睇睇下，又覺得好似差咁啲嘢……係咩呢？啲Model好似有啲唔真實呀。

英國廣告標準局話呀，呢個廣告嘅Model瘦到好唔健康，加埋個大眼袋，睇落成個人一啲精神都冇，會令到觀眾以為瘦就係high fashion，所以要禁播呀！連班網民都留comment話好似睇緊班飢民跳舞咁呀。陰公豬囉，班Model無論係男定女都瘦到皮包骨咁，是咪霞姨冇派飯盒畀你哋呀？

呢頭就有廣告因為Model瘦到唔健康搞到要禁播呀，嗰頭都有人係咁用咩A4腰、挨瘋腳show自己有幾瘦呀。唉，世人都是傻的嗎，其實瘦真係唔一定等如靚㗎，你睇毛毛就知啦。

封面圖片來源：YouTube

資料來源： 英國《衛報》

延伸閱讀： 【唔L係啩】要有「iPhone 6腿」先叫做瘦？