自古以來，女人之間嘅鬥爭，從來都冇停止過。

戰埸，可以係佢哋張床！唔好諗邪嘢喎，毛毛意思係上格床伸個頭出嚟叫下格床幫手拎嘢，下格床就實扮晒蟹咁要人求佢先肯幫手，好似呢兩隻柴狗咁呀。

戰場，無處不在，處處都在！連一張紙，一支筆都可以女人嘅戰場！話說外國有個妹妹寫咗封信畀佢家姐，話佢樣衰、冇朋友、憎死你，仲話希望家姐嫁唔出！雖然佢冇講粗口但係仲難聽過粗口呀，毛毛睇到都忍唔住打個大冷震！

妹妹仲喺封信最尾畫咗個惡魔印記大中指呀，嗚呀，年紀輕輕就咁陰毒，果然女人係唔得罪得㗎！呀話時話，點解阿妹要咁嚟咒家姐呢？佢嫁唔出你咪有排都冇得自己一間房囉？

原來係因為家姐趁阿妹唔喺屋企嗰陣，偷偷地食晒雪櫃啲嘢食呀！細路女，你未睇透啫，偷食嘅嘢，人之常情，你第日個老公都一樣會㗎……所以記得鎖好個老公，呀唔係，雪櫃呀！

其實阿妹惡毒得嚟都幾cute呀，再惡毒嘅說話，毛毛都未驚過呀！

封面圖片來源：Louisa Naau Taukeiaho

資料來源：The Sun