約妹豬出街，妹豬為咗表示隆重其事，梗係要畀心機又襯衫又化妝又set頭咁啦，再加埋臨出門口先唔知襯邊對鞋好，遲到一兩個鐘是常識吧，做男友嘅，咪唯有傻傻下咁自己企喺街條街度等女友囉。聽講有啲妹豬仲會特登遲多啲，覺得咁先顯得自己矜貴呀，卒之咪搞到男友嬲嬲豬囉！哼，簡直禽獸不如呀，個男友！幾個鐘都唔等得，學下呢隻熊貓仔啦！

呢隻陝西嘅癡心情長熊貓仔對佢女神一往情深，但女神叫得做女神，梗係要高高在上先顯得神啦，佢唔知是咪想考驗兵仔嘅誠意，竟然坐咗喺15米高嘅樹上面唔飲唔食足足10日咁耐！

做人兵仔，身不由己，佢又有得點呀，咪唯有坐喺樹底等女神下凡囉。我國先賢葡提老母有云：如果癡癡的等，某日終於可等到一生中最愛。唔知熊貓仔係咪真係可以等到女神呢？！

日子一日一日咁過，10日咁就過去喇，兵仔終於打動到女神，抱得美人歸，同佢一齊享受嬉戲嘅樂趣！嗚呀，呢個故事仔真係史上最勵志嘅故仔呀！咁多位兵仔，你哋都要加油呀！

封面圖片、資料來源：華商網