可能每個學生細細嗰時都試過FF女Miss，不過真係開聲追Miss就真係諗都唔敢諗，而呢個小朋友就真係Take咗action呀，咁識追女仔，真係好叻仔喎！不過可能佢冇咁嘅機會.....

香港嘅特殊學校分咗好幾種，有啲用智力程度嚟劃分，有啲用身體殘障嘅部位劃分，其中一種就係肢體傷殘兒童學校。呢啲小朋友當中有啲同時有智力問題，做呢類學校嘅老師真係好大挑戰。

喺肢體傷殘兒童學校真係要付出十幾廿倍嘅精力同時間先可以教得識呢班小朋友一個字。不過老師話佢唔止當佢哋係學生，所以會叫佢哋做BB。日日處理小朋友情緒問題或者突發事件可能已經花咗大半堂，教佢哋真係要好大好大嘅愛心，而且佢哋九成畢業之後都唔會做到醫生律師返嚟母校多謝你，可能有人會問，咁辛苦點解仲要教呢班小朋友讀書識字呢？

呢首遊子吟唔係一首詩咁簡單，毛毛見到嘅係希望呀，可能呢個只係一個希望工程，但係教育本身唔係就係在於培植希望咩。而對於呢班小朋友，一個老師嘅用心教導可能已經令到佢哋唔會放棄自己，或者只係畀佢哋知道呢個世界冇放棄到佢哋，咁就夠喇。

有好多家長日日夜夜逼小朋友成為十項鐵人，冇病都逼到小朋友有病，呢邊廂有好多家長最大嘅希望就係小朋友可以健康咁長大，或者只係能夠長大，佢哋就心滿意足喇。其實諗返轉頭，咩都係假，小朋友身心都健康咁成長先係最重要㗎。

資料來源：香港特殊學校概覧
如果想睇多啲，可以睇下花老師其他文章：花老師