「若你喜歡怪人 其實我很美」呢句歌詞，毛毛不嬲都好鍾意，因為呢句完全表達到毛毛畀女神嫌棄嗰種無奈......其實，如果女神肯花時間了解下毛毛，或者會發現毛毛嘅美呢，不過等人發現，不如自己主動啲等其他人認識自己啦～就好似外國呢位自閉症小朋友咁，佢最近寫咗首關於自閉症嘅詩，感動近成3萬個網民呀！

話說10歲嘅Benjamin係一名自閉症患者，佢老師最近畀咗一份功課佢，叫佢用「I am」嚟做開頭寫一首詩。毛毛呢啲廢青，不嬲做功課都係交到差就算啦，但Benjamin就好認真咁寫咗篇心底話，睇到老師同爸爸媽媽都好心酸。（Sorly！毛毛英文不嬲出名差，以下內容，是是旦旦翻譯唔好介意。)

Benjamin第一句就直接話I am odd，明白自己喺人眼中可能好唔一樣。佢唔想自己成日都咁唔開心，佢覺得自己就好似一個身處外太空嘅男仔，好擔心人哋點諗佢。當佢喊嘅時候，其他人就笑，令佢好驚。佢覺得自己係一個逃到去荒島嘅人，希望有一日能夠適應到呢個世界，生活唔會再有任何問題。

後嚟，National Autism Association將佢呢首詩Post上Facebook，各地網民睇到Benjamin嘅心底話之後都好感動，有近3萬個like之餘，仲好多人留言鼓勵佢，而Benjamin知道之後都好多謝大家。

Benjamin，其實你一啲都唔怪呀，仲可愛過毛毛好多?，要開開心心咁成長呀，知冇？

圖片及資料來源：Daily Mail