2016年04月23日 星期六
罰你抄學生手冊 你畫1000個顏文字出嚟交貨？
做學生，一個唔小心瞓晏咗，除咗食埋早餐先返學，你都冇乜其他選擇。唔係點喎，飛的返去咁嘥錢，遲到咪最多罰抄，但係陣間因為飛的搞到冇錢食lun廚搞到發育不良搞到成世都係矮仔再搞到識唔到女女就大件事呀嘛！
話說強國有個學生哥因為成日遲到而畀老師罰佢抄呀！你一定想寸毛毛，嘩乜咁大新聞呀咁啦，唔係呀唔係呀，重點係佢竟然冇真係抄學生手冊，而係畫咗1000個顏文字同表情公仔出嚟交貨呀！
聽講呢個同學仔已經唔係第一次畀老師罰抄，所以覺得抄學生手冊有啲無聊，不如畫下公仔仲好過啦咁。
呀，個老師又唔鬧返佢曳曳豬嗰下好嘢啵！老師話，收到呢張罰抄嘅時候真係唔知笑好定喊好，不過既然同學仔抄完之後冇再遲到，就接受佢呢個創意罰抄方法啦！個同學仔畫得咁似，抵讚，不過老師肯接受，仲抵讚！
睇完呢單新聞，毛毛先明白到原來罰抄已經out晒㗎喇，終於都明點解之前office會出現呢張告示……
封面圖片、資料來源：四川新聞網
