毛毛不嬲都話日本人係一個好團結嘅民族嚟。今次熊本地震雖然已經發生咗個幾星期，但依然有好多災民需要大家幫助同支持，唔止好多機構發揮「做得幾多就做幾多」嘅大愛精神呀，就連藝能界都一樣咁有愛！嗱，咩叫「一方有難，八方支援」呢？咪就係咁樣樣囉！
話說今日有網民發現SMAP嘅隊長中居正廣竟然現身熊本，親自煮飯畀啲災民食喎～雖然佢為災民煮飯嘅時候都係戴晒黑超同口罩呀咁，但偶像嘅氣息......毛毛隔住個mon都聞到呀！而有日本網民仲捕捉到佢離開嘅一刻?：
SMAPの中居と遭遇した笑笑 pic.twitter.com/5dc8Jby6Wl
— まつなみひろや (@Na3Hiro) 2016年4月24日
另外，之前毛毛咪同大家提過路飛嘅聲優拍咗條片為熊本災民加油嘅......
最近唔止田中真弓老師，就連其他《One Piece》嘅聲優都話要為熊本災民打打氣呀！事不宜遲，馬上去片：
都知大家唔識日文，等毛毛幫大家9譯（脷伸：唔包譯啱）：
Chopper：「熊本嘅各位，我係Tony Tony Chopper，等我嚟治癒大家啦～」
Zoro : 「我係Zoro，我係一個唔會向神祈禱嘅人，但係為咗大家，我都要祈一次禱。」
Nami : 「我係Nami，唔好唔記得嗰份一直保持笑容嘅堅強呀！」
Robin：「Nico Robin呀，我要和呢啲同伴一齊變得更強大，然後嚟拯救大家！」
Franky : 「我係船工Franky，除咗自己背脊嘅傷之外，我乜嘢都可以整好，所以大家嘅嘢無論如何我都會整好！」
Usopp : 「我係Usopp，大家唔可以輸！我會一直係遠處掩護大家......」
眾人：「會唔會太遠呀！」
Luffy：「熊本嘅各位，你哋係我哋嘅同伴嚟！」
老老77，煮個飯、拍條片雖然唔係啲咩大恩大惠，但精神上嘅支柱呢家嘢......你哋識條鐵咩！唔講喇，毛毛抹返眼角嗰兩滴馬尿先。
封面圖片來源：nekoluno1201、Na3Hiro／twitter
