聽講世上有一種叫做女朋友嘅生物，係最難服侍㗎，一時又話想食日本嘢，去到門口又話都係太生冷喇食泰國嘢啦，去到九龍城又話都係太熱氣喇食粥啦，去到粥舖又話影相唔好睇呃唔到like呀……喂呀一時一樣咁，叫人點跟呀？毛毛明個男朋友有幾無奈呀，咩呀，毛毛係冇女朋友，但唔係淨係得女朋友先咁一時一樣㗎嘛，老師都會咁㗎！

有個家長話佢個小朋友都畀老師搞到好亂呀！小朋友喺中文作文度寫咗「媽媽除了愛吃士多啤梨外，還愛吃芒果」，啲字又整齊，語法又冇錯，畀著毛毛實畀個A佢啫！點知都畀老師話佢錯，刪咗個「士多啤梨」，改做「草莓」呀！

哦，香港要回歸祖國嘅懷抱嘛，「士多啤梨」係音譯詞，咁似雞腸又點成體統呀！用「草莓」就有大國典範喇！不過咁喎，明明數學書都係寫「士多啤梨」，一時又士多啤梨一時又草莓，好難跟啫老師！

因為寫咗「士多啤梨」畀老師話唔啱要扣分，都好唔抵啫！不過都有另一位老師就寫紙仔攝落功課畀學生，教佢哋「進步遠比取得高分重要」嘅大道理，睇到都覺得warm呀。

不過咁，聽講唔少怪獸家長都只係識睇分數，所以老師喺紙仔寫嘅大道理，唔知佢哋明唔明呢？

封面圖片、資料來源：不願小朋友成為功課奴隸