聽講狗狗同主人日又對夜又對，對得耐真係會心有靈犀㗎！唔係佢點會日日見到你收工返屋企攰到隻狗咁個樣，就走埋嚟望下你挨下你，想氹你開心呀！

狗狗唔止識氹主人開心，有啲受過訓練嘅smart狗狗仲識幫手照顧病人㗎！今年4歲嘅細路女Sadie有唐氏綜合症同糖尿病，佢嘅糖尿病通報犬Hero就會用嗅覺留意住佢血糖有冇太高或者太低，有咩事就汪汪汪話畀屋企人知。

平時Hero都好乖好安靜，唔會亂咁嘈嘈閉嘅，但係有一日Sadie返緊學嘅時候，喺屋企嘅Hero無啦啦係咁大聲汪汪汪，媽咪覺得好奇怪，於是就打去學校問下，嗰時Sadie都仲好正常嘅～

點知過咗冇幾耐，Sadie就突然間跌親喇！血糖仲由122跌到去得返82?！好彩醒目仔Hero警告咗媽咪，等媽咪可以叫老師幫手睇實Sadie咋！屋企同學校隔咗足足8公里咁遠，Hero都feel到主人唔舒服，真係超叻仔呀！

見到Hero同小主人睇書又一齊，覺覺豬又一齊，真係覺得好sweet，成個心都溶晒呀……Hero你咁叻仔，記得要繼續守護小主人呀知唔知？

封面圖片、資料來源：SadiesHero