古乳有暈，阿婆走得快，一定有古怪，比卡超照鏡，撞鬼撞到正！

日本有個網友疑似食飽飯冇sss屙，將佢隻比卡超放咗喺三面鏡前面玩玩，仲幫佢影咗張相，點知張相唔講你唔覺，一講你就覺有啲古怪呀！唔知有咩古怪？睇真啲呀，再睇真啲都得喎，右邊塊鏡竟然照到比卡超個正面出嚟呀！係喎，正路應該好似左邊塊鏡咁照到側面先係㗎喎！

個網友諗諗下覺得唔對路，就立馬掉咗隻比卡超喇！當佢勁驚驚自己是咪撞邪嘅時候，塊鏡就無啦啦爛咗喇，仲要左邊同中間都爛，得疑似鬧鬼嘅右邊鏡冇爛咋！唔通右邊塊鏡有鬼怪力量加持，所以冇事？！

佢細心再睇下右邊塊鏡，仲覺得上面好似有個人樣?呀……嗚呀，唔好再講喇，可能係手指印呢，唔好再嚇毛毛好冇……

有網友見到張咁得人驚嘅比卡超相，都叫自己隻鬆弛熊幫幫手照下鏡睇下會唔會好似比卡超咁呀。點知……點知……竟然咩事都冇呀！！！張相咁正常，咁鬆弛熊咪呃唔到like ＆ share囉？咁樣好似仲恐怖過撞鬼喎！

封面圖片、資料來源： otonashi971/twitter

延伸閱讀：【慎入】嚇窒700萬心靈嘅自拍相