毛毛聽公司啲女同事講，話細個嗰陣都好想有個家姐，因為可以偷佢啲靚衫著喎。嗱，毛毛就唔葡萄喇，事關有家姐嘅話分分鐘仲煩呀！

台灣有個服緊兵役嘅網民，難得一次返屋企，竟然發現衣櫃入面多咗條花紋好特別嘅底底。佢一心以為係媽咪見佢耐冇返屋企，專登買條新底橫畀佢賀一賀佢啦。點知原來呢個就係悲劇嘅開始……

咁你知啦天氣咁熱男人老狗最鍾意就係除晒啲衫通屋走㗎嘛，咁當佢返到軍營，諗住吹下風扇嘅時候，突然間覺得有股涼意喺兩腳之間湧上嚟，條孖煙通亦都隨風飄揚，個網民一秒就變咗瑪麗蓮夢露……

咪住先，毛毛大大話話都有著孖煙通廿幾年嘅經驗，照計啲孖煙通唔會咁輕飄飄㗎喎！

當佢入咗廁所諗住除條褲出嚟研究下之後就發現，原來呢條……係佢家姐條短裙嚟……佢家姐知道咗之後仲瘋狂恥笑佢，唉睇嚟呢位網友呢世都抬唔起頭做人㗎喇，嗚！

聽講兄弟姊妹之間嘅鬥爭係呢個世界上最邪惡，最激烈……毛毛突然好慶幸自己係毒生子，55。

圖片來源、資料來源：xun6666/PTT